Александер Греф

Alexander Graeff

Соништата на еден постмодернист

И покрај дождливото време се осмелив да се искачам; специјално изнајмив чизми за пешачење. Висорамнината ја достигнав вечерта. Сонцето само во мислите, сините планини пред очи. Црвена светлина во мојот грклан. Потоа гледам движење: животните продолжуваат понатаму, ние луѓето остануваме. Тоа го имаме култивирано.

Сосема горе се вртам на петици, ја вшмукувам сликата што ми се нуди. Плачам. Не е ветрот она што ме расплакува, тоа е извесноста. Во овој миг ми е извесно: светот околу мене постои. Тој не е само беспланска нишка на едно бесмислено секојдневие. Нештата се повеќе од слики од кои бегам. Црвено, зелено, планини, свет. Гледам: стварност. А сега конечно и гледам што сум: безусловно Прво лице.

Потоа сепак жолчка-жолтиот филозоф вели: “Соништата на еден постмодернист.” И јас се будам.

 

Превод од германски:: Елизабета Линднер

Андреа Шмит:: Соништата на еден постмодернист:: Andrea Schmidt:: Träume eines Postmodernen::  

Од збирката кратка проза:: Runen:: Sic Literaturverlag:: 2015